या लॉकडाऊनमध्ये व्हिडिओ कॉन्फरन्सिंग अ‍ॅप Zoom नंतर भारतामध्ये रिलायन्स जिओ कंपनीने JioMeet व्हिडिओ चॅटिंग अ‍ॅप लाँच केलं. पण, जिओमीट अ‍ॅप आणि zoom चा युजर इंटरफेस, अ‍ॅप आइकॉन आणि बरेच फीचर्स झूम या अँपशी मिळतेजुळते आहेत. आता यावरुन जिओमीटविरोधात झूम कायदेशीर कारवाई करण्याची शक्यता आहे.


याबद्दल झूम व्हिडिओ कम्युनिकेशन्सचे भारतातील प्रमुख समीर राजे यांनी प्रतिक्रिया दिली आहे. ते म्हणाले, “नुकत्याच लाँच झालेल्या रिलायन्स JioMeet आणि झूममधील साम्य पाहून थक्कच झालो”

समीर राजे पुढे म्हणाले “आम्हाला माहित होतं हे होणार आहे…पण ठिक आहे, कारण स्पर्धकाचा सामना करण्याची ही काही झूमची पहिलीच वेळ नाही. आमचं प्रोडक्ट आणि टेक्नॉलॉजी आमची ताकद आहे. आमचे स्पर्धक काय करतात ती त्यांची स्ट्रॅटजी आहे”.

यावेळी कायदेशीर कारवाईबाबत विचारलं असता ते म्हणाले, “याबद्दल अंतर्गत खूप चर्चा सुरू आहे. पण मी यावर काही प्रतिक्रिया देणार नाही. कारण हे प्रकरण माझ्या लीगल टीमचं आहे. ते मी त्यांच्यावर सोपवलं आहे” यावेळी झूम ही चिनी नव्हे तर अमेरिकी कंपनी असल्याचं त्यांनी पुन्हा एकदा नमूद केलं.